بعت لها رسايل غير مباشرة
وقالتله تبعتلى رسايل غير مباشرة
وانا بعتلك رسايل صريحة للمرة العاشرة
خايف تواجهنى ليه؟!!
وخايف منى ليه؟!!
خايف على نفسك؟!
والا خايف على كرامتك؟!!
والا خايف على منظرك وهيبتك؟!!
والا خايف تنقص من رجولتك؟!!
وامتى الحب كان فيه خوف؟!!
اتفرج على العشاق وشوف!!!
الحب عمره مانقص كرامة
الحب عمره مازعزع هيبة
الحب عمره مانقص رجولة
فى عرف مين؟!
نعيش متغربين؟!
كان للألم
كلنا متألمين
كان للوجع
كلنا موجوعين
كان للهم...كلنا مهمومين
كان للظروف
كلنا عندنا ظروف
الحكاية يابنى مش مجرد فقر وجوع ولقمة رغيف
الحكاية انك انهزامى واخدت قرار انك تكون ضعيف
حارم حقك ليه من الحياة؟!!!
وازاى عايزنى أرضى بغيرتك؟!!
وأنت بالحب مصارحتنيش
وعلى الود والهوى معاهدتنيش
ازاى عايزنى أحس بكلمة مقولتهاش؟!!!
الحب مش بس كلمة تتحس
لأ لازم تتسمع ولو بالهمس
عندك حق حظها كدة
قلبها دهب وحبت واحد قلبه فضة
دى ياما حاولت معاك وياما
ملقتش منك غير الملامة
وكلمة خلاص لمى ورقك مع السلامة
حبرك جف ودى أكبر علامة
وانت مجرد قصايد حأقطعها وتترمى فى القمامة
بدون أسف وبلا اعتذار أو ندامة
قالتله أنا عمرى ما حأبقى قصيدة خوف
عمرى ما حأبقى أسيرة ضعف
حأبقى قصيدة حب وخير
وعمر ما حبرى فى يوم ح يجف
وبرأسى مرفوعة حأمشى وأسير
ويوم ما حأحب أحب راجل شجاع حر
مش خواف وأسير
وحتندم وترجع تبكى
وترجع تشكى وتحكى
وتتفهلو وتعمل فيها ذكى
بس ساعتها ح أقولك خلاص بطلنا قصص وحكى
وح ترجع حياتى من بعدك عادية
وجرحك مش ح يخلينى أعيش فى أسية
ولا ح يخلى قلبى قاسى وأبقى سادية
ولأنى اقنعت منك ومعدتش تهمنى
ح أعيش حياتى بنفس رضية
أنا ليه حبيتك من دون الناس
يااللى مارعيتش لحبى وكرامتى أساس
طبيعى تكون بدون احساس
وبقينا اتنين غراب عن بعض
ولا حسناش بقيمة بعض
ده احنا أصلا مش زى بعض
من شهور حبتنى
وكنت عايز تقابلنى
يابنى انكسف ده أنا لية سنين مستنياك
أتاريك وهم عشت على سرابك
ووهبت ليه عمرى واتعبدت فى محرابك
أنت قاسى
رغم جواك جدع
بس الوجع بيقلب الجدع لمجرد حسرة ووجع
وليه ماأرميش الملام على الواد
اللى قال انه عاشق ومن زمرة العباد
لكن عزمه اونخوته مقبلش يكون عواد
وليه وازاى تبنى رأى خيالى وكدب عاد
وتقول انك فى هواى بقيت عبيط
يابنى ده أنا اللى مليون عبيط
ومتمثلش دور الضحية عشان تاخد صيت
أنا اللى غلطانة لك
وأنا اللى محقوقة لك
اذا فى يوم تانى عاتبتك أو سألتك
فين اللى كنت فاكراه سيف
اتسند عليه واشد حيلى وأقيف
طلع كله وهم وزيف
بقيت على قلبه عالة وأسوء ضيف
وبقيت فى خيالى ذكرى لأسوء طيف
هويدا محمدالحسن عثمان الكاملابى
ليست هناك تعليقات:
إرسال تعليق