الباستا فلورا / تارت المربى / المبروشه وصفه سهله وبمكونات بسيطه ، والتارت هش ولذيذ

المقادير

٣كوب (٣٧٥ جرام)دقيق متعدد الاستخدامات

٢ بيضه بدرجة حرارة الغرفة

نص كوب (١٠٠جرام)سكر

نص كوب (١١٥جرام) زبده سايحه

معلقتين كبار(٣٠ مل ) زيت

معلقه كبيرة (١٠جرام) بيكنج باودر

معلقه صغيره فانيليا

ربع معلقه صغيره ملح

الحشو

ربع كيلو (٢٥٠جرام) مربى مشمش أو أى نوع مربى تحبوه ممكن يزيد لغايه 350 جرام لو بتحبوا الحشوه كتير

الفرن على ١٨٠ بياخد حوالى نصف ساعة

الطريقه، نخلط البيض والسكر حتى يمتزجوا جيدا ثم نضيف الفانيليا والزبده والزيت ونخلطهم جيدا مع بعض

نضيف كل المواد الجافه على بعض ونقلبهم، ونبدأ نضيف الدقيق على مرتين على الخليط ونلم المكونات بدون عجن لغايه ما الدقيق يختفى ونحصل على العجينه المناسبه ، نقسمها تلت وتلتين ، نضع التلت فى بلاستيك راب ونضعها في الفريزر ، والتلتين نلفها فى بلاستيك راب ونضعها فى التلاجة لمده من نص ساعه لساعه تقريبا

نخرج تلتين العجينه من التلاجه ونطريها شويه بإيدينا ونفردها جيدا بسمك متساوى فى صينيه التارت مقاسها 28 أو 26 ، ونقوم بتخريمها بواسطه شوكه ، نضع الحشوة ونقوم ببرش تلت العجينه المتبقى على التارت ، تدخل الفرن على ١٨٠ لغايه ما تاخد لون دهبى حلو تقريبا بتاخد نص ساعه وممكن نفتح الشوايه فى الآخر

ممكن نزين الوش برشه سكر بودره

بالهنا والشفا