أجمل شئ فى الفيس انك تقدر تصفى حساباتك فيه.... خاصة اذا كنت من النوع المؤدب اللى ميقدرش يشتم أمام الناس...عموما انت اللى جبته لنفسك أنا ح اتكلم معاك باللغة اللى تفهمها...ومفيش أحسن وأبلغ من العامية...واستعد يابنى لفرش الملاية...وده الأسلوب اللى بتفهمه وينفع معاك اتحملت منك كتير...تلقيح وحركات...والجمل كتر عليه الحمل... وياويلك من الهادى المتحمل الساكت الصبور....ياويلك منه ومن انفجار بركانه ح أبدى الحكاية واسمعوا...فى البداية تلقيح...قلت يابت عيل طنشيه...وبعدين بقى لما يشوف مسئول معنا فى العمل يحول الشغل لزميلتى...كأنه بيشوه صورتى وكأنه بيبعت لهم رسالة انى لا أعمل ومش شايفة شغلى...وزى قلتى... وواجهته باللى فهمته وطبعا أنكر وقال مقصدش...ونسيت أو بالعربى اتناسيت ورجعت ريمالعادتها القديمة...وطبعا هوه وأصحابه عملوا عصابة واتفقوا...مهما شوية بغبغانات ممشيهم على عجين...وملعبهم زى العرايس الخشب... أوعى ياواد تكون فاكر كدة ح ازعل واستفز واسيبلك الدنيا والشغل وأهج...غلطان يالة...أنا اسيبه بمزاجى...واللى يكرهنى فيه بالعند ح أقعد على قلبه... أوعى تكون فاكرينى فرفورة...والا حنكوشة دا أنا بنت حارة ومش أى حارة...دا من حوارى عابدين يا لة وأنت عارف حوارى عابدين مش زى أى حارة...أحنا الشهامة والجدعنة والشجاعة...مابنخافش الا من اللى خالقنا واذا كنت صايع...فأنا بابا يالة...أحنا نعلمك الصياعة بس الصياعة بأدب.. نادية الجندى قالت فى فيلمها...وأنا اقتبس منها ف اسمع يالة...أنا هويدا والأجر على الله...دا أنا براوية ومحدش قدر عليا... فاكر ح تقدر انت...ربنا ما يوريك كيد النسا....وهنشوف بكرة كيد بنت حوا والا ولاد آدم... دا أنا....وأعوذ بالله من كلمة أنا...ورحم الله امرئ عرف قدر نفسه...امرأة بمليون راجل...وتسمع عن عساكر الجيش أهو أنا كنت عسكرى فى الجيش...وكان بيلقبونى ب(الهوا) تعرف معنى كلمة هوا فى الجيش ايه؟!!!! يعنى مبخافش المشاكل ومستبيعة ومش فارق معايا حاجة كان لما يواجهنى مشكلة مكنتش بمشى بتدرج الرتب... وامشى ليه ل صول والا مساعد...وانا عارفة انهم بيجاملوا بعض زيك وزى أصحابك...كنت بمشى مباشرة لأكبر رتبة لواء قائد الوحدة...وأنا مستعدة لو موقفتش عند حدك...ح أصعدها معاك للآخر...لعلك فاهمنى أوعى ياولة تكون فاكر أن أنا ح أسلم وأرفع الراية... أنت عايزها حرب وأنا مستعدة...لعلمك أنا متعودة على الحروب والمعارك من صغرى وعمرى ما خسرت أوعى تقول أن أنا ماحذرتكش...انت بديت والبادى أظلم مشكلتى انى مش منافقة زى جماعتك ولا بأدى رشاوى ولا غيره...صدقنى لو كنت كويس وطيب كنت هديتك بس للأسف أنا مبجيش بلوى الدراع ولا بالقوة ولا الحيلة ولا البلطجة...وياويلك لما تحطك بنت حوا فى دماغك أوعى تقول محذرتكش...وقد أعذر من أنذر هويدا